قصيده بحفل زواج اخوي محمد بن عبدالعزيز بن عجوين...

03-28-2013

اسعد الله مساءكم بكل خير هذه قصيده قلتها بحفل زواج اخوي محمد بن عبدالعزيز بن عجوين وابو حمود مهما كتبت فيه لااوفيه حقه من المدح

العام تنخاني وانا كنت ياسعود=ودي ولكن فيه شي حداني
خلاني ابعد واترك الدرب مسدود=واقول خيره والعوض يوم ثاني
والا الصحيح الصدر به شعر محشود=وقصيدتي لاسترسلت متعصاني
ورثه فهود وارثينه من فهود=منهم كسب اجمل وصوف البياني
ماصغته ارجي طيب والا ابي زود=من خلقتي وانا عزيز بزماني
منا ولد فايد ومنا من حمود=ناظر سما فوق الكواكب مكاني
وبين العرب مانيب ياسعود مجحود=محفوظ عند الناس ياسعود شاني
واليوم دامني بهالحفل موجود=ابشر بما يظهر فصاحه لساني
بنظم لك اللي كنها صفه عقود=واطرب مسامع مشتهين المعاني
في محفل اللي بالذكر دوم محمود=راع الفعول الطايله والحساني
اهلا اهلا مليون وتزود وتزود=بلي حضر حفله طويل اليماني
في حفله اللي يزبنه كل مضهود=مروي مهاديف السيوف السناني
راع الكرم والعز والجاه والجود=وراع الفعول اللي عليها الضماني
مواقفه ترقى به سنود وسنود=يرقى سنود ولايحب الطماني
شيخ لايعدوا هل الطيب معدود=ولا ينكره الا خبيثن هداني
يوم الكويت ومطلب الرزق محدود=وبيته لعصمان الشوارب مكاني
ولاهو غريب الجود من منبع الجود=لنه ولد شيخ تعلا وباني
لاقيل منهو قلت من يجهل حمود=جدي زبون اللي حداه الزماني
ابذل له المجهود من فوق مجهود=حتى ابيض وجه منهو نخاني
ونيابه عن سربه كلها فهود=حياكم الله من بعيد وداني
على الهلا والبن والهيل والعود=وعلى الشحم بمثقلات الصياني