إهـــــــــداء لــ ورثة الجاه والعز العجاونه خاصة وبني رشيد عامة

السلام عليكم ورحمة الله وبركاته وأسعد الله مساكم
قال الشاعر صالح بن جميعان بن بدوي المظيبري , في حفل الشاعر عمير بن مناع العجوني , المُقام في مدينة حائل وذلك يوم الخميس 5 /3 / 1434هجري , هذه القصيدة مُستذكرا ً رموز قبيلة بني رشيد (الشيخ عيادة ابن عجوين والشيخ قاسم ابن براك) ومُتطرقا لهم وذلك برمزية شِعرية فريدة في قصيدة جزلة في معانيها ومضامينها جاءت لتحمل الكثير من الاسقاطات على أحداث تاريخية هامة والتي كان لإبن عجوين المسمى فيها الدور الأبرز في تلك الحقبه الزمنية الهامة المظطربة والمليئة بالصراعات والمُتقلبات السياسة وهي الفترة الأخيرة من عمر الأستعمار التركي وامتداد النفوذ البريطاني على بعض الأقطار القريبه المجاورة في منطقة الخليج :

غيث نشت ليلة البارح مواديقه = من غرب يردم سحابه والهواء ساقه
يردم على الرأس الأبيض من مفاهيقه = ومقدام مزنه على آبانات وداقه
مسبل رعوده تجلجلها بواريقه = يشعاك نوه قبل يشعاك براقه
أمسيت ألاحيه وأستمطر رقاريقه = لياحن صدره رضيت وزاد رقراقه
امسى يجلجل لي الصدر ومغاليقه = لين انفلق من عتيم الليل فهاقه
واعشوشب الروض والتمت زماليقه = واومى خفيف النسايم في تزملاقه
مادري وش آخذ واخلي من عشاريقه = زاد النفل والبختري في تعشراقه
شي اطيقه وشي نوب مااطيقه = أصد لو أني جدير وعندي الطاقه
مليت من شهرة الشعر وعشاشيقه = وكليت لو معظم العربان عشاقه
بعض المواقف ياابن عجوين توهيقه = ليا صرت ماأنت بمريّح ولا على راقه
وراسك عزيز وعريبات معاميقه = وأشفق على مدحة اللي مثلك شفاقه
آعي مرادك واهملج فيه وافيقه = يمسي ويصبح بنون العين وأحداقه
حرمت عيني من النوم وغداريقه = ليا خادن الجفن هملاج الكرى فاقه
العذر لو يستوي سويت تلفيقه = لاشك ياعمير ماعينت له ساقه
أهم ماتربط الواثق مواثيقه = وأهم ماترتبط بالشاعر اخلاقه
الشعر ماهو حلال وعند سويقه = ماكل من هز شومه قام واستاقه
يبري هجوسك قبل تُبرى طواريقه = وأن مابريته فلاتجزع تطراقه
جيش العمالق من يعين عماليقه = مسؤل وقت الشدايد عن تعملاقه
السهل هرج المجالس من هماليقه = والصعب اللي يشيل الحمل ووساقه
والراس عقب أرتفاعه عيب تدنيقه = إلا لطاعة عظيم الشأن خلاقه
واللي جراله مع الأحداث تصفيقه = يبطي وهو ماتناسى كف صفاقه
واللي ضلوعه هشاش ويابس ريقه = بالموقف الصعب ماياقف على ساقه
تثّر بوجه الزمن عجة مماحيقه = وأشر مابالزمان وجيه محاقه
الوقت مايحفظ بدرفة صناديقه = إلاأرجح ينحت التاريخ بأعماقه
مستشرق الغرب وش ضمن بتوثيقه = يوم ابن عجوين من بد الملاعاقه
واللي تستر وشلنه مزاريقه = حاول يخفي وعين الصقر رماقه
من دون راع البويضاء في لواهيقه = مسرول الساق جثل هزّع اشناقه
حر على كف جاسم في مسابيقه = طلعه حقوق ومداره ماحد واقه
صاروم عزام جزام بمصافيقه = فداع ويجندل الجزلة بمعلاقه
وفي دورة الوقت والغصن ومواريقه = عِبرة ليا سلم الله تبرض اوراقه
الحلم لأصبح هدف ماكاد تحقيقه = والليل لو هو طويل الصبح فلاقه
مااحد عبث بالوكاد إلامماريقه = وعمر الزمن فلتر العابث ومراقه
ماضاقت صدور عبس ولابها ضيقه = من ميلة الوقت والاقلة أوفاقه
في مغرب الكون وإلا في مشاريقه = راياتها في سماء الأمجاد خفاقه
لأهل الوفاء أوفى من القلب ومعاليقه = وإلا المعادي ضرر عينه وغساقه
ذرو المعالي بني مي مطاليقه = أرضه وساسه ومزعومه وشوهاقه
عبس الظفر والفخر وأسمى شواهيقه = ردت على راعي الميثاق ميثاقه

وسلامتكم جميعا ً
الشاعر صالح بن جميعان بن بدوي المظيبري