قصيده بعمي الشيخ عبدالله بن حمود بن عجوين..

اسعد الله مساءكم بكل خير هذه قصيده كتبتها بعمي الشيخ عبدالله بن حمود بن عجوين واخو نوره مهما كتبت فيه لن اوفيه حقه.

ياحمود سلم لي على ابوك ياحمود=وقبل يديه وغرته في محله
واثن السلام لمنبع الطيب والجود=واليا انتهيت من التراحيب قله
قله يقول اللي على العز مولود=اللي حوى طيب العرب في سجله
ان ماكتبت الشعر في مدح ابو سعود=لابو قصيد المدح ياحمود كله
عمي زبون اللي من الوقت مضهود=من بعد ربي يلتجي تحت ظله
هداج تيماء لمحل الوقت مورود=سمحن جنابه والكرم عادتله
وعن باقي العالم ترى شبره يزود=كلن شهد وانا بعد شاهدله
يفرح لياجوه المسايير ويجود=ماشح راع الطيب في لقمتله
من قل يذبح مارجا المدح والزود=نهجن لبوه وكمله منهجله
هذا الكرم يلي كرمكم بلا فود=مغير قول وفخفخه دون مله
بابه مشرع ماذكره يوم مردود=وقوله هلا يامرحبا كلمتله
في مجلسن مايلحقه اي منقود=مجلس يظل اللي جلس تحت ظله
لاقال اخو نوره وكمل ببو سعود=يشوش راسي وانطرب فرحتله
وعساه يبقى ذخرنا دوم بسعود=ويحماه ربي من بلا كل عله
وختامها ياحمود طالبك ياحمود=قبل يديه وغرته في محله
وقله ترا مرزوق لازال موجود=يامر وانا ياعزوتي فدوتله