قصيده الى الاخ بدر بن نفاع بن قعبوب...

اسلم وسلم لي على بدر نفاع=ثم بلغه بالعلم بينك وبينه
قله تركت الشيش ماعاد له داع=مامن وراه الا الغثى والغبينه
انا هواي ليابرق بارق وشاع=وفرحت على شانه نفوسن حزينه
واقبل من المنشى له الريح تباع=وسكن هواه وزاد فيه السكينه
ثم ادلهم من السما ماه نباع=وطاح الربيع وكثروا مدورينه
ورحنا نتمشى بخايعن نبته انواع=متخالطن شيحه على ياسمينه
ماغير تسمع لم سالم تلعلاع=والعشب كنه باسطن راحتينه
مفارقين اهل التباغض والاطماع=قومن جداهم بس شيل الضغينه
على ردى مع ذل مع قله اسناع=تبت يدين اهل العلوم الدفينه
اقفل عن هروج المساكين الاسماع=واربط مع الطيب علاقه متينه
واسج رجلي دامها فجوجن اوساع=وابعد عن الكتمه وفوضى المدينه
مع شله شرواك يازين الاطباع=وشروا اللذي موصل جوابي بحينه
لنك من اللي ذكرهم بالوفا شاع=ياسعد من كانوا ذراه وعوينه
عيال ابن قعبوب ساطين واسباع=وميقافهم وقت اللقا محتمينه
دخيلهم مايسهر الليل مرتاع=ينام كنه في حصونن حصينه
من دون قاصر في طويلين الابواع=ربعي زبون اللي قصارن يدينه
عجاونه لاصارت صياح وافزاع=تاطا على وجه العدو وتهينه