ضلعان اجا....

لنقد ناس وللقصايد عشاشيق=وللعز درب ولدعاوي طلايب
وصحيح هالدنيا حظوظ وتوافيق=وهبه من الرحمن جزل الوهايب
احدن فعوله بين ربعه مواريق=وتندى يمينه مثل وبل السحايب
واحدن ورى غرات ربعه مشيفيق=يبحث وراهم بالردى والنكايب
عفنن يحب الناس دايم مفاريق=عايش على التفريق بوم الخرايب
جعله بهالدنيا قليل التوافيق=ويبلاه ربي بالمحن والمصايب
واللي يحسب الطيب لعبه وتلفيق =بكره تعرض له سموم اللهايب
الطيب مايبغى خبول ومطافيق=يرددونه بين هافي وخايب
يبغى اللذي مرباه روس الشواهيق=ذخرك ليادارت عليك النوايب
ماهوب خبل ضارين لتدانيق=ليانزرته كش خايف وهايب
وياهيه يلي تحسب الدرب تشريق=راسك من الصكات ماهوب تايب
قلي متى من غرقه النوم بتفيق=وتشيل عن عينك جميع العصايب
وتنظر ثياب العز صارت مفاتيق=وتشوف كيف الثلج هالحين ذايب
اللي بصدرك خزنه بالمغاليق=عمر الزعل ماصار بين القرايب
وراع الردى لتقضبه علم ويويق=وبكره يهذري عند ناقص وعايب
ولاتعتزي في ناقضين المواثيق=اهل النقيدي والحسد والمصايب
ومن لاحسب لك من حساب المطاليق=كبه ولاتحسب لمثله حسايب
وابعد عن اهل النمنمه قد ماتطيق=وعيال عمك لاتجيها السبايب
لياسمعت بذكرهم شي مايليق=اضرب ولو دونك تحط النصايب
عيال عمك لاجفوك المخاليق=وثاروا عليك مدورين النشايب
وقاموا يحدونك عن الدرب وتضيق=وتجمعوا دونك ربوع وحزايب
صفوا معك ماحسبوا للمطافيق=وساروا ولو دونك تشب الحرايب
وقدم لجيرانك من الطيب مايليق=وخلك لهم بالوقت سور وحجايب
بكره يعدون السوالف مواثيق=اما امدحوا والا لحقتك المعايب
هذا الصحيح وخابرك شخص ذويق=تفهم وتعرف كل ماهوب صايب
ارق العلا من قبل لاينشف الريق=وتعد حسبه من حساب الذهايب
خابرك من روس الرجال المطاليق=ضلعان اجا ماحسبت للهبايب