انا لي وليف

انا لي وليف كل مازاد عام احلو
ينقض جروحي مثل ماينقض قرونه
وانا اقول لله حقك وكل مابدالك سو
حلالك وقلبي في يدينك درقسونه
ولاتقول لي ليتك ولاتقول لو ولو
ترى لو تفتح باب لأبليس وظنونه
تطبب بقلبي وان بعد مانفع به كو
توافق لك فتوق لها سنين مدفونه
شفوفي فراش كل ماشاف ليحة ضو
تهاوى ولو هم عن لهبها يردونه
عيونه عيون اللي كْشِف برقعه لي تو
عليه اكثر عيون الصقاقير مفتونه
تلهويت عن سوده بسوده بدو ودو
أومي لها والقلب يومي لمظنونه
كسرني على غره ودنقت له من قو
عليه الفؤاد من الوله كوسر لحونه
غياب الاحبه مر مامثل جوه جو
تبسم حزين القلب والهم بعيونه
غياب يقلل قدر وغياب زود علو
تحلو لوجهه في عيوني تشوفونه