الشعر في جملة مفيدة .. الشاعر لازم العجوني

الله على اللي لانهمته ينشميك
جيبٍ جديد من الجيوب الجديدة

أنا أشهد أن الجيب دايم يهقويك
ليا نوى سايقه دارٍ بعيدة

ربحان بياعك وربحان شاريك
شيك مجير ماينقص رصيده

يازين تصميمك وياحي طاريك
من صممك لو كان كافر وليدة

ليا استوى خطك وزانت مساريك
يطلّع من الشكمان نار وقيدة

ولاتاخذ اللي بالمجالس يخطيك
اللي علومه نصها ماتفيده

رافق خويٍ دايم يفتخر فيك
نظيف قلب ولايمد الزهيدة

اللي على أغلى عياله يبديك
ماتغيّره عنك الظروف الشديدة

له خطوتن يمشي بها مع مماشيك
الساس طيب والمواقف حميده

كثر التجارب يافتى الجود تنبيك
شفنا الهوايل من دروس عديدة

ولاتشاور اللي لابدا الراي يعميك
عليك في رأي العقول الرشيدة

ترا قليل الدين يغير مباديك
ويجنبك درب الهدى والعقيدة

جايز يصير اليوم ضدك بناخيك
لو جبتله بالشعر جملة مفيدة

الشاعر/ لازم العجوني