ماني على من ينقل الطير زاري
بس الصقاره بعضها وش سنعها
لاصار ماينسر صدور الحباري
وإليااعتلت يم الخضيرا هلعها
هلعت شجاع بإقتحام الطواري
إليا اقبلت روس الطواغي قبعها
والا مضلي على القفز ضاري
لاصل جنحانه ونفسه دفعها
هذا الولع مابين دعب وخباري
وذيك القفار اللي كبار تلعها
والا انتهض بالمرتبه عن يساري
تقل عاتقه داب رقبته رفعها
ومخالبه راحت سوات الشباري
وكن المناكب قوس لامن هنعها
طلعن بعيد وراح تقل متثاري
وان فاختته أدلى شمام وخنعها
افجح قصير ذراع ماهو بعاري
مسرول كفه كفو لو جمعها
تقول ناحته هبوب الذواري
كاشف عليه النفس يكبر طمعها
ياننقل اللي فيه منه مواري
وإلا بلاش من الحرار وولعها