قصائد شعراء القبائل في مدح بني رشيد

--------------------------------------------------------------------------------

شعراء القبائل وثنائهم على قبيلة الرشايدة العبسية العريقة

من شعراء القبائل الكريمه بذكر بني رشيد ( نسبهم - عاداتهم وتقاليدهم ومواقفهم )


من شعراء القبائل في ذكر عبس وغطفان وبني رشيد

الشاعر عبدالرحمن العطاوي العتيبي :

وللشاعر قصيدة موجهة للشاعر سعدان بن عابس الرشيدي وقد ذكر فيها نسب الرشايدة ونختار منها مايوافق موضوعنا :


هلا عدد ما هلل المحرم وكبر = وطاف وشاهد الركن اليماني
بعبسي النسب جزل المثايل = خلافة عنتر العبسي ضماني


الشاعر عايد رغيان الشراري :
وله قصيدة موجهة للشاعر حباب السندي الرشيدي ونذكر منها ما يوافق مضمون الموضوع وهي :


مشكور يا ابن عبس بالأعراب = ضمن البوادي يا زبون المخلاه
مادام رزقي كافله رب الأرباب = والعبد ماله غير صدقاه تقواه
والشمس تشرق بالسما والهوى هاب = والكون واللي به مخاليق مولاه
عندي شهادة كان للحق طلاب = لا أريد حسناها ولا أريد جزواه
ماني من اللي يذكر الحق بحساب = وأنتم بعبـس ولا بذلك مراواه
غطفان بيته ماسكينه بالأطناب = وأنتم عموده رافعينه بمبناه


الشاعر عبدالرحمن طلق الخويتم العتيبي :

وله قصيدة مرسله للشاعر موسى بن عمران الرشيدي ومنها قوله :


لكان دور من بني عـبس مقباس = مقباس الظلما بليل الغلاسي

الشاعر ناجي سعد الصندلي السبيعي :

وله قصيدة موجهة لأحد شعراء الرشايدة وقد جاء فيها :


أشغلتني وودعتني تقل حماي = بين العرب دايم أهز بعصايا
منك وعشيرك ماتسوي سواياي = انشد بني عبس السباع الدهايا
وانشد سناعيس الجبل وابن عصاي = وهوازن اللي يكسرون الغزايا


وقال باجح بن عبيد الله العنزي عندما كان مجاوراً لجماعة من قبيلة بني رشيد قصيدة منها هذه الأبيات :

لي جيران يعزون يا عيد

من رافق الطيب عن العفن شامي

أنا فهم تلقى الدلال البغاديد

ومحماس بن دب الأيام حامي

لبتني معهم على كيف ماريد

ريف الضعيف مسيحين اليدامي

من لابة يستاهلون التماجيد

رشايدة ودخيلهم ما يضامي



الشاعر عبدالله بن عبار المعنى العنزي :هو صاحب كتاب (( أصدق الدلايل في نسب آل وايل )) وله قصيدة طويلة في مدح قبيلة الرشايدة نذكر بعض منها وهي :


قلنا الحقائق والخطا مالنا به = نترك مجاله مالنا فيه مقصود
ونرد قيل اللي الفخر يلتقا به = درب الرذيلة بابها عنه مسدود
ياشوق من يزها الأصابع خضابه = نشمية ماله شديا مع الخود
من عزوةٍ يثنون يوم الحرابة = نطيحهم يقفى من الطعن مسرود
في ساعةٍ والسيف يقطر انصابه = والجو يقد حبة باريد بارود
بني رشيد اللي تفك النشابة = منسبهم حظة ضعيفاً ومقرود
يوم الفعول أو يوم دور المجابة = دور النضا والشلف والخيل والقود
بعصور من حث المطايا ابعقابه = كلن هجينه ساريا العقب ملكود
كم خيراً صنديد ما ينصخا به = مقدام غوش ولابساً جوخ ماهود
رموه يوم العج يسمك ضبابه = دوار صيد أو بينهم صار مصيود
عقب العليا خلوه يشكي صوابه = من عقـب ماهو صايلن عاد ملهود
يوم انثنا يشمت شوير غزا به = يابا القطيع أولا خذا منه مفرود
عقب الطمع صار الغنيمة ركابه = ياريف من جاكم من الوقت مضهود
مدحتكم ياهل الفخر والمهابة = ياريف من جاكم من الوقت مضهود
نعمن بكم يوم الرشا بكترابه = أو نعمن بكم والدور بسهود ومهود


وله أيضاً


ليا جيت بن سندي فدوة الدعابيل = عطه الرساية للفهيم يهجاها
من لابةٍ تنطح قبال المقابيل = رشايدة بالكون يقهر عداها
ليا طار ستر منظفات المجاديل = قبيلة تحجي ويذري ذراها
ولا قبل بالمخلوق مير المكاييل = أدخل على الله مانشح بعطاها
قبيلة ما أذمها بالمفاعيل = من زان حظه باللفا ما شناها
يا ما بهم من خيرين قواتيل = نمر ليا خم الفريسة رماها


الشاعر رتيبان مقعد المجمعي السبيعي :

لقاك ريف الضعيف الجار والخوي

بني رشيد مدلهين الجاري

ناس الوفاء والطيب والعز والسخى

ومن غير ذلك فيهم الوقاري

هل كرمة توجد على كل جزه

ومهيلات فوق جمر الناري

يشهد لهم تاريخهم بفعالهم

بني رشيد معذبت الأمهاري

على العدو سم سقطري قاتل

ودخيلهم ما تحلقه الأخطاري

فرح بهم بالضيف من قل جهده

سعد الرفيق وللعدو أشدادي

بني رشيد مطوعين العاصي

وحرار من ساس الجدود أحراري

الشاعر حمد المطبوخ الهاجري :

وله قصيدة في مدح براك ناصر النون الرشيدي وجاء فيها :


مجذوب من ربعٍ لهم صيت وعلوم = ما هو بخافينا ولا هو بيخفاك
واللي ينافق عند الأشراف مذموم = يقوله اللي معجبٍ في سجاياك


الشاعر محمد خلف الخس المطيري :وله قصيدة موجهة للشاعر حميد الذيابي الرشيدي رحمه الله وفيها يقول :


وانصفق مقضى تاصل لحية يدينه = لو يباري القطاة اللي تقلب سبقها
أشقر من نسل شقران متخيرينه = من حرارٍ يعرفون الرجال وامعمقها
أوصله شاعرن كل العرب خابيرنه = كم بيوت مثل نظم الجواهر طرقها
هو حميد الرشيدي كلكم عارفينه = المعاني مع أهل العرف يفتح نفقها


الشاعر مسلط الشيباني من عتيبة هذه الأبيات من قصيدة طويلة :

بني رشيد اللي ليا صاح فزاع
تشبع نهار الكون جايع سباعي

الشاعر عبدالرحمن عتيق الجهني :

وله قصيدة قالها في الشاعر حميد الذيابي يقول فيها :

ماجاب بالمعنى ضعيفة وميله = معذى جنابه عن كلام الخمالي
أنا أشهد أني من سلايل قبيلة = بني رشيد اللي تحل الشكالي
ياحب نفسي للرجال الجميلة = اللي معانيها هي شف بالي


الشاعر شباط الظفيري :

وله قصيدة ونختار منها :


من لابةٍ يفرح بها كل معسور = بني رشيد بطيبهم واقفيني
واللي هقا فيهم من الناس مسرور= والطيبين بذكرهم بينيني
تاريخهم في صفحة المجد منشور = على طريق العز متكاتفيني


الشاعر عقيل الشمري رداً على الشاعر عبد العزيز علي الرشيدي :

يالله يا علام ما يخفي البال

بديت بأسمك يا عظيم الجلايل

ومن بعدها نبدي على رد مرسال

لابن الرشيدي وافيين الخصايل

نعم بكم بالقدم ماضيين الأفعال

من فعلكم تشهد جميع القبايل

عدوكم يشرب من السم منهال

وسيوفكم عطسا على كل عابل

صحيبكم ما يشتكي ضيقه البال

ينسى أهله مع طيبين الحمايل


الشاعر مساعد الحربي :

يا حسر من ماكرٍ حرار عناتيت

بني رشيد مفرقين الولائي

ولا جانها رفيه للجميع تشتيت

وصاح الصياح وثار عج الخفافي

لعدوهم سم ذحاح وحلتيت

ومطوعينة بالسيوف الرهافي

نعم بهم وبمدحهم ما نقاصيت

عن مدحهم تقصر تعابير قافي

الشاعر عبدالمحسن بن نعس بن دهيوب الشمري :

وله قصيدة في مدح عبدالله مساعد البغيلي :


يابن مساعد طيب الجد والخال = من لابةٍ جزل العطا هو مناها
من ماكرٍ بالطيب يفعل وفعال = صعلول الرجال اللي تناحي عداها
عقب البغيلي يا ثوا غالي المال = جزل المواتر ماتكفى عطاها
من لابةٍ ما طاوعت كل عذال = يوم القوامة حقها من خذها
بني رشيد اللي بها المدح ينقال = عز الرفيق ليا كدابه رشاها


الشاعر سعد بن حميدة الحربي :
له قصيدة يمدح بها فارس من المضابرة وهو ابن حنيه في معركة محيوة ونذكر منها :


ابن حنيه يعتزي باصل عريب = حظه كبير وبندقه قد جابها

وهنا الشاعر مطني رسام الشمري يقول في بني رشيد :


بني رشيد تبذل المال والزاد = واليا لفاهم الضيف قالوا هلا به
وشيوخهم تعطا السبايا بلا عداد = ومن صار بوجه نحورهم الذيابه
ودليم أبن براك نعمٍ بلا عداد = راع الفعول الطيبة والنقابه
فتح سلومٍ طيبة وبالفخر ساد = شيخ الشيوخ وكل ربعه تهابه



وقد قال الشاعر شليويح غازي الحربي
مخاطبا حمود بن سرور الرشيدي في قصيدة طويلة نذكر منها:

انتم شداد العز وانتم ردوفي =قبيلة لها بالمغاريف غراف


الشاعر الطريسي الحربي :
تلقى بيوت اللي يهلون بالضيف

مفروشة للضيف زل الزوالي

بني رشيد مفرقين المواليف

منزحت نشر الحريب الموالي


الشاعر ذعار بن الحويلان القحطاني:
بني رشيد أهل الكرم والقوانين

قبيلة ياطيبها من قبيلة

أنتم مهدين الصعب والشياطين

قبيلكم ما هو بيبري غليله

وقال الشاعر سماح العنزي ..

قبـل ماأبـدا اقــول بـاسـم الله رب العالمـيـن الالــه الـلـي اعـبـده واصـلـي لــه واصـــوم
ومـن بعـد ذكـر الله اقـول قـولـي واستعـيـن اسـألـه باسـمـاه وصفـاتـه الــرب الـرحــوم
نـاصـر المظـلـوم مــن جورظـلـم الظالمـيـن كـــل مابـالـكـون يـفـنــى وهــوحــي يــــدوم
واحــدن فــرد صـمـد لــه عـبـاده سـاجـديـن جل من فـي قدرتـه بالسمـا مرسـي النجـوم
اطـلـبـه يـجـعـل لـنــا حـــظ عـنــد الطـيـبـيـن شاعرن من عرض شعار مدعـي ومعـزوم
ليـا دعونـا أهـل الـوفـا بـالـوازم حاضـريـن واستجبت لدعوة أهل الوفـا حسـب السلـوم
جـيـت اشــرف حفلـكـم ياكريـمـيـن الـيـديـن ياسـلايـل عنترةالعبـسـي مـرويـن السـهـوم
يـابــنــي رشـيـدلـكــم الـقـبـايــل شـاهــديــن الـخــوي تـثـنـون دونـــه بـحــزات الــلــزوم
تكرمـون الضيـف والجـارفـي مــر السنـيـن والـدخـيـل ليـانـصـاكـم مــعــزز ومـحـشــوم
وذي عـوايـدكـم مــــن عــصــور الاولــيــن تاقفـون بوجـه مـن كــان نفـسـه بــه تــزوم
فعلكم معروف والناس باللي نقوله عارفين قـــول يـتـلـي فـعــل بالازمـةمـاهـي عــلــوم
وخيرما قلنـاه صلواعلـى شفيـع المسلميـن عــد مــا يمطـرمـن الـمـزن هـتـان الـغـيـوم



وقال الشاعر لافي جلعود الشمري .. نأخذ منها التالي ..

لبيـت دعـوة طيبيـن المواجيـب
أهل المـروه والنفـوس الحبيبـه
وعاداتنا نجزأ هل الطيب بالطيـب
بإخلاص جاه وفـي معـزه وهيبـة
ومن بعد هـذا ياكـرام الاشانيـب
أحـلا المعانـي وأبهجـه نبتديبـه
حضرت ضيف وفي حفاوة معازيب
بني رشيد أهـل الفعـال العجيبـة
اخصهـم بازكـا تحيـه وترحيـب
يا آل الرويضي طيبين المواهيـب
يفخر بكم شهـم النشامـا واديبـه
من عزوةً طبعه تصـد الحواريـب
على الخيول وفوق كـور النجيبـه
لهم بوقفـات النشامـا مضاريـب
مايهتني في زيـن نومـه حريبـه
وخويهم والجـار وقتـه تطاريـب
والضيف ما يقابل بنفسـاً غضيبـه
يلقى هلا يلقى بشاشـه وترحيـب
مايلحقه خـوف الامـور المريبـه
اقول حق ومضهر الحـق مايخيـب
بني رشيد سيـوف مـن ينتخيبـه
لا قل حلو المـاء بحـر الواهيـب
على صويباً فيـه حـل المصيبـه
وردوا وصفوا خابثات المشاريـب
قول وفعـل ياعـز مـن يعتزيبـه
والى غدى الرصاص مثل المشاهيب
وكثر العدد بين القتيـل وصويبـه
نلقاهم اللـي يتقنـون التصاويـب
وغاراتهـم ياكـم شيـخ يغديبـه
والجود ماقالـوا دراسـه وتدريـب
طبـع النشامـا والدوينـي يهيبـه
وعبدالله المبروك معروف بالطيـب
ومبروك يشهد له مديحـه وطيبـه
عنـد الاقـارب كلهـم والاجانيـب
الجود عيبه كان هو صـار عيبـه
رمز الوفاء والمرجله له مكاسيـب
وكـل الفعـال الطيبـه يعتنيـبـه
بالدين والدنيـا علومـه غواليـب
والدين ينصر كـل مـن يحتميبـه
وصلو عدد مايعلم الله مـن الغيـب
علـى نبيـاً سنـتـه نهتديـبـه

وقال الشاعر عبدربه العتيبي



وثالثهـن ليـا مـاخـاب ظـنّـي
مخـوّة طيّـب الأصـل الفريـدي
هـذاك اللـي يـعـزّك مايـذلّـك
لاصارت خوّته خـوّة رشيـدي!!
بدون قصور فـي بـاق القبائـل
هل الطـالات والفعـل الحميـدي


قصيده صوتيه لبني رشيد سلايل عبس لمبارك الشوباش الشمري .. اضغط


الشاعر جابر الجعدبي العريفي الظفيري:له قصيده ذكر بالقبايل نورد منها ماذكر في بني رشيد ..

وبني رشيد اهـل الفعـول الرشيـده
رشايـده بالطيـب نـعـم البـديـده
علـى المعـادي خاتمتهـم شـديـده
لا جات مهمات الفخـر فعلهـم بـأن
........
رفيقهـم لا صـار ضايـق ومهمـوم
الكـل منهـم فـي ملازيمـه يقـوم
الـي يعيـش بقربهـم دوم محشـوم
افعالهـم دايـم جزيـلات وسـمـان


الشاعر محمد العطوي:

عسى الحيا يروي ديار الكريميـن
بني رشيـد اللـي نزلنـا وطنهـا
جينا من الديره عطاشـا محيليـن
والبدو ماتلحـق جرايـر ضعنهـا
ساعة نزلنا في ديـار الشريفيـن
عزاز النفوس اللي يـذري كننهـا
اسقـوا غنمناوالبهـم والبعاريـن
وطابت نفوسٍ ظيمها قـد شحنهـا
صاروا لنا أطيب من بنيخي قريبين
جيران والجيرة عطونـا ضمنهـا
بجوارهم عشنـا كـرام عزيزيـن
مدة طويلـة مـا يحسـب ثمنهـا
عاشوا على الشدات والعسر واللين
بني رشيد رجال تحمـي وطنهـا
للجـار حلوينـن وللضـد مريـن
وقبيلةٍ ياسعـد مـن كـان منهـا
قصيدة للشاعر محمد بن سالم العطوي


الشاعر والنائب السابق طلال عثمان السعيد يقول :


لا وهنـي منهـو ربـوعـه رشـايـده . . فزعاتهـم وقـت الصعيبـات كايـده
خاويتهم عسرة سنيـن ٍ علـى النقـا . . وحصلت منهـم بالصعيبـات فايـده
يا زيـن خوتهـم ويـا زيـن طبعهـم . . رفيقـهـم مــا ينـسـي فــي شـدايـده
وان شفت بالدنيا سنافي وصيرمي . . انشـد وتلقـا نـص ربـعـه رشـايـده


الشاعر سلامة بن سعد العنيني الجهـنــــــي :


بني رشيد لابة فخرها ثابت ثبات طويق

هل الطولات وأهل المجد حاضرها وماضيها

مشاكيل الرجال اللي لهم موقف نهار الضيق

يفرج كربـــة المضيوم عن منضام شاكـــيـها

مزبنة الدخيل ان ضاق به وقته ونشف الريق

ليا منه دخل بوجيههم عينه تنام الليل هانيها

صقور الطيب مكسبهم ولا عنه الزمان يعيق

عزا يمهم تســـود الأرض ما هابت مساريــــها

لهم عند القسوم خيارها ويحفها التوفيق

صناديــد شبات سيوفها بالدم ترويــــهــا

بني رشيد وان جاء موقفاً يطلبه التلحيق

ملحقة الخوي تحمي الديار ومن سكن فيها

مواقفهم تشرف والشرف بفعالهم تحقيق

على عز وشرف فرسان عبس حماة عانيها

ليا شانت نوايا خصمهم همه يجي توسق

يذوق المر يحرم ما يذوق الخصم حاليها

وليا جت بالعلوم الطيبة تأخذ سما ء تحليق

قبيلة بالخصال الطيبة تسمو مباديــــها

رجال المجد منهجها على قد الثريا ء تسيق

عزايمهم كريمين السجايا الطيب قاديها

لو ان الشعر يوفيهم مديح بمدحهم ما ضيق

دواوين القوافي في بني رشـيـــــد أسويها

لكن المعذرة منكم وهذا اللي عليه اطيق

بني رشيد جزلين الفعول فعول ما احصيها

الشاعر محمد بن الذيب العجمي موجه هالقصيدة لشاعر نايف الرشيدي : علـم رشايـدة الكويـت الطيـب منهـم منهـلـه
رجال عبس اللي بنوا لي فـي قلـوب العـز بيـت
احفـاد مجـد الماضـي اللـي يحفظـه مستقبلـه
هاماتهـم مثـل الجبـال الشـم وأولهـا حفـيـت
سـلالـة الـعـز القـديـم بعـزهـا متسلـسلـه
ودي اصرح لـك وخـاف انـك تحطهـا مانشيـت
وينسـل سيـف وينتخـي عـزوة وتقـدح قنبلـه
مـاودك إلـى ضاقـت فجـوح الوسيعـه كمبليـت
ودارت عليـك النايـبـات وتعّبـتـك المعضـلـه
إلا رشيدي مـن رشايـدة نجـد وإلا أهـل الكويـت
مـن دون قاصـر فـي رجـال مجدهـم مانجهلـه


الشاعر تركي الميزاني المطيري (تركي 2000)موجه هذه القصيده لشاعر عبدالله بن سكات الرشيدي :

ان بغيت مساعده يالشريف ابن الشريف
ابشر بعـــــــزك يابن عبـــــس والله اكبرى
نرتكــــي للحمل لو كان ما حملك خفيف
ونطلب الله يـــــــسره من جبر والا اومرى
وانت تحلم مثل غيرك وكم لك من وصيف
مثل ابو زيد الهـــــــــلالي واخوك وعنترى

الشاعر والصحفي عبدالله عبيان اليامي :

سلام ياهل الشهامه بالوفا مكسـي
يسوقه الطيـب والخافـق يهليبـه
على سلايل دليم وعنتـر العبسـي
اهل الظفر والكرم والعز والهيبـه
قبيلة لاصفق موج البحـر ترسـي
وتطب سـوق المنايـا ماتباليبـه
على دروب المراجل تصبح وتمسي
وخيالهم لا اعتزاء بانت مضاريبه
اقولها من الساني وابصم بخمسـي
من شان من يجهل التاريخ يدريبه
ان كان للمجد بشت وللفخر كرسي
ان اشهد ان الرشيدي دوم يحريبـه

في النهايه اتمنى اكون وفقة بهذا الموضوع لقبيلتي التي اعتز بانتمائي لها وقبلها كمسلم اعتز بدين الله وسنة رسوله صلى الله عليه وسلم ..


اخواني في المنتدى وفي جميع المنتديات ..

وفقــــني ووفقــــكم الله بما يرضيه ..

الله يعطيك العافيه على هالنقل

قصائد جميله وبني عبس يستاهلون

الله يعيطيك العافية على هذا الموضوع

وتستاهل قبيلة بني رشيد

الله الله الله صح السان كل شاعربي رشيد يستاهلون المدح ولاهي غريبه عليهم والله ميستوي المدح الا الهم ولا نبخص حق احد

بني رشيد مفرقين المواليف

منزحت نشر الحريب الموالي

صح لسان كل شاعر مدح بني رشيد ويعطيه العافيه

تستاهل بني عبس

الله يٌعطـيگ الف عٌافيه موضوع في قمه الرٌوعْه

مشكور اخويي العجوين على هذا المضوع والطرح الرائع

يعطيك العافيه علي النقل وربعي يستاهلون

صح لسان كل شاعر مدح بني رشيد ويعطيه العافيه