"فعل النداوي" من جديد الشاعر لازم العجوني

السلام عليكم ورحمة الله وبركاته
وكل عام وأنتم بخير و عيد مبارك على الجميع، قصيدة جديدة للشاعر لازم بن ظاهر العجوني عبارة من مُعايدة لمن يستحقها مُهداة للمهندس عوّاد بن فايد بن عجوين الرشيدي:
الليل ميدان الشعر والقصايد
وأنا على بعض القصايد شفاوي
نبغىٰ نتّسلىٰ في جديد الفرايد
الفكر في بدع الفرايد رهاوي
ودي أعايد ناس قبل المعايد
لو كان بعض الناس عنا نحاوي
أعرف رجال العز بوقت الشدايد
أهل المروه لا بلتك البلاوي
ماهي هروج مكبرين الوسايد
الي فقدناهم نهار العزاوي
جربت أنا مابين ناقص وزايد
لين أتضح ليء زين فعل النداوي
الطيب يحري فيه عواد فايد
عواد ابن فايد بعيد الهقاوي
أبوه قبله بالمواقيف سايد
يضرب على الموت الحمر ما يراوي
من عزوة عند اللقىٰ ما تحايد
يوم الردي بالضيق يلويه لاوي
ربعي بني عجوين أهل العوايد
الي يعاديهم يطيح متساوي

الشاعر: لازم ظاهر العجوني ،،