راضي على المقسوم لو قسمي قليل
انا (( عدو الكايدات )) وندها
اما فعول اللاش والوجه الذليل
اشره على اللي يفتخر ويعدها
لو مالت الوقفات عزمي ما يميل
يثبت مثل روس الجبال وخدها
ان كان ماني درع ابن عمي واشيل
منه الهموم اللي تعب من كدها
حرام ما يهنى عيوني نوم ليل
وهو يعابل همها ويحدها
الصاحب ابن العم .. حتى لو يعيل
انا معه عوق الخصوم وضدها
ان كان ما حنا مزابين الدخيل
لا خير فالوقفه ولا في مدها
الاصدقاء فيهم من السيف الصقيل
سيفين محد يختلف في حدها
سيف لحزات الطرب حده يميل
وسيف" لحزات النشايب قدها
يا الله تغفر لي قبل يوم الرحيل
النفس ما تدري متى هو حدها
لو النبي المصطفى طه الجليل
ما هو يقول افشو السلام وعدها
ما كان سلمنا على كف البخيل
ونمد يمنى ما بغينا .. مدها
نعيش فالدنيا مثل عابر سبيل
دنيا الفنا .. ننزل بها ونشدها
حنا تربينا على العلم الجزيل
من تجربة روس عريب جدها
نفوسنا لو ما لقت غير القليل
ما بيحت سود الليالي سدها
مهما فعلنا للرفيق المستحيل
افعالنا ما نفتخر .. ونعدها
ارواحنا تتعب على رد الجميل
لكن جمالتنا .. ما نبغي ردها